心意媽媽下廚手記

豬仔骨係屋企冰箱成日都有既野，有時間醃既話就成排醃完焗(可參考底部BBQ醬燒焗豬仔骨食譜連結)，無時間醃就切件整蒜香骨，貪佢易入味又好食，做法極簡單，醃完放入airfryer炸10分鐘左右就食得。出面食通常用油炸，但屋企用氣炸鍋可以將啲多餘既豬油逼晒出黎，好味得黎又少啲內疚感~😆 材料: 豬仔骨 1條 (約1磅) 炸蒜 適量 醃料: 生抽 1湯匙 雞粉 半茶匙 淮鹽 1/4茶匙 胡椒粉 1/4茶匙 紹興酒 1湯匙 蒜頭 6瓣 (切碎) 糖 1茶匙 蛋白 1湯匙 粟粉 2湯匙 做法: 1，豬仔骨解凍，洗淨，撕走筋膜，切件。 2，把豬仔骨放入保鮮袋，加入醃料(豉油、雞粉、淮鹽、胡椒粉、紹興酒，蒜蓉，糖)，輕按豬仔骨確保每條豬仔骨均勻沾上醃料，醃至少1小時或過夜。 3，炸前加入蛋白及粟粉拌勻。 4，放入氣炸鍋，以180°c氣炸5分鐘，反面氣炸5分鐘。查看金黃程度再加2-5分鐘。 5，取出上碟，灑上炸蒜即可享用。 小貼士: 1，氣炸時間按豬仔骨大小而異，請自行調校。 2，如沒有氣炸鍋，可以焗爐以220°c焗約20分鐘至金黃色。 如果喜歡一整排焗既西式豬仔骨，可按以下連結: https://32mama.blogspot.com/2019/09/bbq.html

鮮茄焗豬扒飯係我讀書年代既回憶，係香港人既話一定喺茶餐廳或快餐店食過~ 其實屋企要整到大家樂果種一哥焗豬經典港式味道亦唔難，最緊要係個開胃既蕃茄醬汁，配埋個炒飯底，自己整仲可以鍾意加幾多芝士都得，食到你夠🤩! 小朋友食呢個飯通常都食得好快手，因為鮮茄汁真係好開胃，仲可以按自己喜好加青豆/西蘭花/菠蘿/青椒等等其他蔬菜一齊焗，等佢地唔覺唔覺食埋啲菜，一個飯搞掂晒，係大人細路既健康之選~ 材料: (3-4人份量) 豬扒 3-4塊 (約500-600克) 蛋 1隻 (煎豬扒用) 生粉/麵粉 適量 (撲豬扒用) Mozarella芝士 適量 醃料: 生抽 1湯匙 糖 1茶匙 生粉 1茶匙 紹興酒 1湯匙 炒飯底: 米 2杯(煮後成4碗冷飯) 蛋 2隻 鹽 1/4茶匙 醬汁: 洋蔥 1個 (切塊) 乾蔥 3粒 (切片) 蒜頭 3瓣 (切片) 茄汁 2湯匙 蕃茄膏 1湯匙 生抽 1.5湯匙 蕃茄 2個 (切件，1開6) 雞湯 300ml 糖 1.5湯匙 粟粉水(打芡用) 1湯匙粟粉+3湯匙水 做法: 1，把豬扒洗凈，用刀背拍鬆，加入醃料拌勻，醃至少30分鐘。 2，白飯放於鑊中，加入蛋液炒勻，加鹽調味，盛起鋪於焗盤中。 3，豬扒撲上粟粉，沾上蛋汁，放入鑊中煎至金黃色及熟透，盛起備用。 4，於鑊中加點油，放入洋蔥炒香，加入蒜蓉及乾蔥頭略炒。 5，加入蕃茄膏、茄汁、生抽及蕃茄，把所有材料炒至軟身。 6，加入雞湯及糖，煮至湯汁轉濃，最後加入適量生粉水收汁至所需稠度，如有需要可按個人喜好再作調味。 7，把豬扒鋪於炒飯上，加入已煮好的醬汁，灑上芝士碎，放入已預熱至220°c的焗爐焗10-15分鐘至芝士轉金黃色。 小貼士: *每家焗爐火力不同，請自行調校時間。 *如果沒有茄膏，可以按食譜再加2湯匙茄汁取代。 *此食譜足夠四人食用，如想做二人份量則把所有材料減半即可。

燒豬仔骨基本上係party food必備，同朋友出街食西餐實會叫既菜式，有時出街食仲覺得某啲餐廳整得唔夠腍，其實喺屋企整超簡單，買樽現成BBQ醬，醃完肉用焗爐焗，完全係低成本食到飽加零技巧，大人細路都啱食，有焗爐既朋友不妨試下~🤗 材料: 豬仔骨 1公斤(約2條，如不夠此重量請自行按比例調節醃料及調味料份量) 醃料: 蒜粉 1茶匙 紅椒粉 1茶匙 洋蔥粉 半茶匙 孜然粉 半茶匙 黑胡椒碎 半茶匙 鹽 1茶匙 油 1湯匙 醬汁: 燒烤醬 250毫升 (不同牌子的燒烤醬味道也有不同，需自行試味再調整) 李派林喼汁 半湯匙 蒜蓉 4瓣 油 1湯匙 做法: 1，豬仔骨洗淨，把背面薄膜撕走，印乾。 2，把豬仔骨放於錫紙上。 3，加入醃料，均勻地塗於豬仔骨兩面。 4，包上錫紙，放入雪櫃醃6小時或過夜。 5，從雪櫃取出放於室溫半小時回溫。 6，預熱焗爐180°c。 7，把包好錫紙的豬仔骨放入焗爐，以180°c焗1小時。 8，從焗爐取出豬仔骨(同時預熱焗爐至240°c)，把醬汁塗上豬仔骨兩面，放回焗爐以240°c焗10分鐘(需打開錫紙)。 9，轉Grill模式烤3-5分鐘，取出，靜置10分鐘讓肉汁回流，上碟。 Baked baby back ribs with barbeque sauce Ingredients: 1 kg baby back ribs (around 2 racks) Marinade: 1 tsp garlic powder 1 tsp parika 1 tsp salt 1/2 tsp grounded black pepper 1/2 tsp onion powder 1/2 tsp cumin 1 Tbsp oil Sauce: 250ml BBQ sauce 1/2 Tbsp Worcestershire sauce 4 cloves garlic 1 Tbsp oil Directions: 1, Rinse the ribs, peel off the tough membrane that covers the bony s...