心意媽媽下廚手記

鮮茄焗豬扒飯係我讀書年代既回憶，係香港人既話一定喺茶餐廳或快餐店食過~ 其實屋企要整到大家樂果種一哥焗豬經典港式味道亦唔難，最緊要係個開胃既蕃茄醬汁，配埋個炒飯底，自己整仲可以鍾意加幾多芝士都得，食到你夠🤩! 小朋友食呢個飯通常都食得好快手，因為鮮茄汁真係好開胃，仲可以按自己喜好加青豆/西蘭花/菠蘿/青椒等等其他蔬菜一齊焗，等佢地唔覺唔覺食埋啲菜，一個飯搞掂晒，係大人細路既健康之選~ 材料: (3-4人份量) 豬扒 3-4塊 (約500-600克) 蛋 1隻 (煎豬扒用) 生粉/麵粉 適量 (撲豬扒用) Mozarella芝士 適量 醃料: 生抽 1湯匙 糖 1茶匙 生粉 1茶匙 紹興酒 1湯匙 炒飯底: 米 2杯(煮後成4碗冷飯) 蛋 2隻 鹽 1/4茶匙 醬汁: 洋蔥 1個 (切塊) 乾蔥 3粒 (切片) 蒜頭 3瓣 (切片) 茄汁 2湯匙 蕃茄膏 1湯匙 生抽 1.5湯匙 蕃茄 2個 (切件，1開6) 雞湯 300ml 糖 1.5湯匙 粟粉水(打芡用) 1湯匙粟粉+3湯匙水 做法: 1，把豬扒洗凈，用刀背拍鬆，加入醃料拌勻，醃至少30分鐘。 2，白飯放於鑊中，加入蛋液炒勻，加鹽調味，盛起鋪於焗盤中。 3，豬扒撲上粟粉，沾上蛋汁，放入鑊中煎至金黃色及熟透，盛起備用。 4，於鑊中加點油，放入洋蔥炒香，加入蒜蓉及乾蔥頭略炒。 5，加入蕃茄膏、茄汁、生抽及蕃茄，把所有材料炒至軟身。 6，加入雞湯及糖，煮至湯汁轉濃，最後加入適量生粉水收汁至所需稠度，如有需要可按個人喜好再作調味。 7，把豬扒鋪於炒飯上，加入已煮好的醬汁，灑上芝士碎，放入已預熱至220°c的焗爐焗10-15分鐘至芝士轉金黃色。 小貼士: *每家焗爐火力不同，請自行調校時間。 *如果沒有茄膏，可以按食譜再加2湯匙茄汁取代。 *此食譜足夠四人食用，如想做二人份量則把所有材料減半即可。

屋企耐唔耐都會整方包，有時食剩左，擺得耐乾乾地硬硬地就會唔想食... 想解決左啲隔夜方包，整多士!烘三文治又食到悶悶地既話，不如用黎整下甜品，食材都係屋企常備既，準備功夫只係15分鐘，用焗爐焗半個鐘出爐就食得🤗~ 趁熱加埋雪糕一齊仲好食， 又係一個簡單又好食既甜品。 材料: (2人份量，烤盤尺寸20×12.5×5cm，也可用甜品焗杯) 方包 2片 (也可用法包) 提子乾 2湯匙 肉桂粉 1茶匙 牛奶 200毫升 糖 25克 雞蛋 1隻 雲呢拿香油 1/2茶匙 做法: 1，方包撕成小塊，鋪於焗盤內。 2，蛋打散成蛋液。牛奶加入糖，以微波爐或小鍋加熱至糖融化。 3，把牛奶逐少加入蛋液拌勻，加入肉桂粉、雲呢拿香油拌勻後，過篩把氣泡隔走。 4，預熱焗爐至180°c。 5，把布甸液加至焗盤內，加入提子乾，把麵包向下輕壓避免麵包浮起，靜置5-10分鐘讓麵包完全吸收。 6，放入焗爐以180°c焗30分鐘至金黃色(如用甜品焗杯可自行減少烤焗時間)。 7，出爐撒上糖粉，趁熱享用。

腸仔包係細個最常食既麵包之一，經典造型成日見，自己整可以整下唔同造型吸引一下小朋友食慾，再加啲千島醬酸酸甜甜，成功成為一心既最愛之一😁~ 麵團材料: 高筋麵粉 250g 湯種 50g 雞蛋 50g (約一隻份量，如蛋重量不同可自行於牛奶份量加減，保留部份蛋液最後掃面) 牛奶 90g 奶粉 10g (可不加) 砂糖 20g 速發酵母 4g 鹽 2g 牛油 25g 湯種材料: 高筋麵粉 10g 水/牛奶 50g 餡料: 香腸8條 湯種做法可按此連結: https://32mama.blogspot.com/2019/10/blog-post_8.html?m=1 做法: 1，將材料放入麵包機，濕材料(湯種、牛奶、蛋)先放，再放乾材料(鹽、糖、奶粉、麵粉、酵母)。 *酵母應放進酵母容器，如沒有的話，酵母和鹽應分開放，以免壓抑酵母活躍程度。 2，啟動麵糰模式。材料攪拌成糰後放進軟化牛油。 3，麵糰完成第一次發酵後(發至兩倍大)取出，放在工作檯。  4，用手按壓麵糰排氣，把麵糰分割成8等份，滾圓，用濕布或保鮮紙蓋上麵糰，靜置15分鐘。 5，把麵糰壓成橢圓形，翻面，把香腸放於麵糰側邊，卷起成筒形，收口向下。 6，把包好香腸的麵糰切開6段，只切2/3但不要切斷。 7，打開成花形，放於已鋪上牛油紙的烤盤上，放入焗爐或蓋上保鮮紙，作最後發酵約45分鐘。 8，掃上蛋液，加上千島醬(也可按個人喜好用茄汁或沙律醬)，撤上紫菜粉或乾燥巴西里。 9，放入已預熱焗爐，180°c焗15分鐘。取出放於鐵架放涼。